धनगढी–डडेल्धुरा सडकखण्डको स्तरोन्नति तथा कालोपत्रे कार्य निर्धारित म्यादभित्र सम्पन्न नहुने देखिएको छ। सडक डिभिजन कार्यालयका अनुसार ठेक्का सम्झौताको म्याद सकिन दुई महिना बाँकी रहँदा काम ५५ प्रतिशत मात्र सम्पन्न भएको छ।
वर्षा सुरु भएपछि सडकखण्डको दुई स्थानमा पहिरो गएको छ। पहिरोले एक दिनसम्म आवागमन अवरुद्ध बनाएको थियो। हाल एकतर्फी सञ्चालन भइरहेको छ।
निर्माण व्यवसायीले वर्षा र ढुङ्गागिट्टीको अभावले काम प्रभावित भएको जिकिर गरेका छन्। डिभिजन कार्यालयले भने काम सुरु हुनुअघि नै सामग्री व्यवस्थापनको योजना हुनुपर्ने भन्दै म्याद थप सहज नहुने संकेत गरेको छ।
यो सडक पहाडी जिल्लाका बासिन्दाका लागि धनगढी पुग्ने मुख्य मार्ग हो। बिरामी बोक्न, विद्यार्थी आउजाउ गर्न र कृषि उपज बजार पुर्याउन यही सडक प्रयोग हुन्छ। “बर्खामा हामी घरभित्र थुनिन्छौं,” अमरगढीका एक स्थानीयले भने।
