बझाङ जिल्लाका धेरैजसो स्वास्थ्य चौकीमा सरकारले निःशुल्क वितरण गर्नुपर्ने आधारभूत औषधि अभाव भएको छ। स्वास्थ्य कार्यालयका अनुसार निःशुल्क वितरण सूचीमा परेका ९८ प्रकारका औषधिमध्ये आधाजसो भण्डारमा छैनन्।
ज्वरो, संक्रमण र दमको औषधिसँगै गर्भवती महिलालाई दिइने आइरन चक्की पनि सकिएको छ। “गाउँबाट तीन घण्टा हिँडेर आउँछन्, औषधि छैन भन्न पर्दा नराम्रो लाग्छ,” एक स्वास्थ्यकर्मीले भने।
जिल्ला स्वास्थ्य कार्यालयका जिम्मेवार अधिकारीले ढुवानी ठेक्का प्रक्रिया ढिलो भएको स्वीकार गरे। “खरिद भइसकेको छ, ढुवानी बाँकी छ। वर्षामा सडक अवरुद्ध हुँदा पहाडी चौकीसम्म पुर्याउन कठिन हुन्छ,” उनले भने।
स्थानीय तहका जनप्रतिनिधिले भने समस्या ढुवानी मात्र नभएर योजनाको हो भन्ने तर्क गरेका छन्। “हरेक वर्ष वर्षा आउँछ। वर्षा आउनुअघि भण्डार भर्ने योजना बनाउनुपर्ने हो,” एक वडाध्यक्षले भने।
औषधि किन्न बाध्य भएका बिरामीले निजी पसलमा तीन गुणासम्म बढी मूल्य तिर्नुपरेको गुनासो गरेका छन्।
