अछाम जिल्लाका सामुदायिक विद्यालयमा शिक्षक दरबन्दी वर्षौंदेखि रिक्त छ। शिक्षा विकास तथा समन्वय इकाईका अनुसार जिल्लाका ६४ माध्यमिक विद्यालयमध्ये २३ मा विज्ञान विषय पढाउने स्थायी शिक्षक छैनन्।
धेरै विद्यालयले स्थानीय स्रोतबाट करार शिक्षक राखेर कक्षा चलाइरहेका छन्। तर करारको तलब स्थायी शिक्षकको आधाभन्दा कम हुने र समयमा नआउने भएकाले योग्य शिक्षक टिक्न नसकेको प्रधानाध्यापकहरूले बताएका छन्।
“गत वर्ष तीन जना करार शिक्षक राख्यौं, वर्ष सिद्धिनुअघि दुई जना छोडेर गए,” साँफेबगर नजिकैको एक माध्यमिक विद्यालयका प्रधानाध्यापकले भने। “काठमाडौं वा धनगढीमा अवसर पाउनासाथ जान्छन्। दोष दिन मिल्दैन।”
गत वर्षको एसईई नतिजामा अछामको औसत प्रदेशभरमै सबैभन्दा कमजोर देखिएको थियो। विज्ञान र गणितमा विद्यार्थीको उपलब्धि विशेष कमजोर रह्यो।
प्रदेश शिक्षा मन्त्रालयले पहाडी जिल्लामा शिक्षक आकर्षित गर्न विशेष भत्ताको व्यवस्था गर्ने बताएको छ। तर यो प्रस्ताव तीन वर्षदेखि दोहोरिँदै आएको र कार्यान्वयनमा नआएको स्थानीय शिक्षक संघको भनाइ छ।
